لعــبد الاميــر اليـوم ظيمي ارد اكته
خصــخصوا امبيرات ليــش انــت سكته
سيد علاء الغالبي.....
بسم الله الرحمن الرحيم.....
يا أَيُهَا الّذِينَ آمَنُوا لا تَرْكنُوا إِلى أَلّذِينَ ظَلَمُوا فَتَمَسَّكُمُ النار
قال الرسول الاكرم محمد صلى الله عليه واله وسلم....
كلكم راع وكلكم مسؤول عن رعيته.....
الى حضرة الاخ العزيز قائم مقام قضاء الشطرة المعطاء عبد الامير حسن تعيبان المحترم.....
نسولف بسوالف اهلنه الاوليه احسن......
1.اذا من الناحيه النسبيه انه وياك الخال وابن الاخت وبهاي انه اطلب واسولف وياك...
2.اذا من الناحيه الاجتماعيه انت الراعي وانه احد افراد الرعيه وبهاي اطلبك واسولف وياك...
3.اذا من ناحيه العباده فإنت خادم للامام الحسين (ع) وانه ابن الامام الحسين (ع) وبهاي اطلبك واسولف وياك...
4.اذا من ناحية العلاقه السببيه انه وياك نرجع لرسول الله (ص) ولعلي ابن ابي طالب (ع) من باب قول الرسول لعلي ياعلي انا وانت ابوا هذه الامه وبهاي اطلبك واسولف وياك...
5.اذا من ناحية العقيدة انه وياك يرجع ولائنا لعلي ابن ابي طالب (ع) وبهاي اطلبك واسولف وياك...
ابو حبيب المحترم....
نزلت قضية الخصخصة هاي الايام واجوا جماعة الكهرباء لشارع الشوملي وصارت نقاش طويل وي واحد من موظفين الكهرباء وجان الامر طبيعي فجاوب هذا الموظف الشريف
((تدفعون فلوس الكهرباء غصبن ما عله خشومكم))
احنه نكَدر نجاوبه بساعته وجواب شافي بس سكتنه لاسباب عقلائيه (جلب وعظنه خوب مانروح احنه هم نعظه)
المهم تره ابو حبيب البعث بظلمه تره ما كسر خشومنه كفيلك اخو زينب العباس وتعرفنه انت شخصياً كلش زين....
بس المشكله يابو حبيب انت مقتنع بسالفة الخصخصة ؟؟؟؟
اذا مقتنع بيهه انه اسف واسحب كلامي امام الملأ....
واذا مامقتنع بيهه لازم تسوي حل لهاي الناس المظلومه تره هاي الناس انت وليهه الشرعي حالياً امام الله ورسوله يوم القيامة وكفيلك الله تره كل شايب بالشطرة هو حسن علي ال تعيبان وكل عجوز بالشطره هي ام عماد فإذا ابو عماد وام عماد موجودين شلون راح تخدمهم يابو حبيب....
ابو حبيب...انت ابن الشطره اباً عن جد يعني مو لفو عالشطرة والشطره عن بكرة ابيها همه اهلك واخوانك واولادك مابيهم الغريب وجاي يبنون املهم عله الله سبحانه وتعالى وعله محمد وال محمد الطيبين الطاهرين وعليك بهاي الايام ما معقوله تهمل اهلك وتخلي ظيم هاي الحكومة الفاسده تكفخ بأهلك ذات اليمين وذات الشمال امام مرآى ومسمعٍ منك يابو حبيب...
يعني منين تجيب هاي الناس الفلوس للكهرباء وانت تدري كلش زين الوضع تعبان والخريجين كَاعده بدون وضايف والما متخرجين هم كَاعدين....
يعني تقبل عله اهلك يبوكَون حته يدفعون فلوس الكهرباء ؟؟؟؟
ماشوف وجدانك يقبل بذلّة اهلك....
ومن يبوكَون راح يحاسبهم القانون...
ولهسه الناس تعاني من ظيم عديله المصخمه من سوت الباص بشده واليوجعه راسه ياخذله شده وياه للمستشفى الحكومي حته ياخذ حبوب راس وانوب اجتنه الخصخصة....
وانت تدري بينه شخصياً احنه حالتنه الماديه كلش زينه وخير من الله.. لكن هاي الناس التعبانه منو يهتم بأمرهه....
يعني بهاي الحاله شلون يابو حبيب ؟؟؟؟
وهذه اسعار الكهرباء المدمرة!!!
5 امبير بــ 15
و10 امبير بــ 40
و15 امبير بــ 80
و20 امبيربــ 155
و25 امبير بــ 255
و30 امبير بــ 325
و40 امبير بــ 525
و50 امبير بــ 750
و60 امبير بــ 900
بعد ظلت يمك السالفه وارجوا ان تفكر بشغلتين::
1.. يجب عليك تذكر حسابك يوم القيامة لان انت اكثر الناس اليتحاسبون باجر بصفتك والي المدينه ومطلوب منك خدمة لهاي المدينة وانشاء الله انت كَد هاي المسؤولية....
2..تخلي الرحمة توصل لكل امواتك وبالخصوص لخالي ابو عماد من خلال خدمتك للناس المظلومة المضطهدة.....
(حطـت ارجاب النـاس كلـهه بثنيتك)
(وانه ادري بيك هديب هل عاتبيتك)
(من تحجي بالديوان تنقد فشل عيب)
(ومـن عاتبت ادريك خلـفة مذاريب)
سيد علاء الغالبي....
الكلام هوايه وما ياخذه الفيس....
وارجوا ان تسامحني خاف طلعت مني كلمة نابية.....
واخر دعوانا ان الحمد لله رب العالمين والصلاة والسلام على خير خلقه محمد وعلى اله الطيبين الطاهرين.....
والله من وراء القصد.....
ليست هناك تعليقات:
إرسال تعليق